DD News वर आत्ता एक छान कार्यक्रम पाहिला. सुमन कल्याणपूर यांची मुलाखत. मुलाखत दूरदर्शन स्टुडिओत झालेली होती. म्हणजे प्रकृती उत्तम आहे. इतका वेळ सुमनजींना बोलताना पहिल्यांदाच ऐकलं. छान बोलतात. आवाजाचे चढउतार बहुधा नाहीच. एका संथ लयीत उत्तरं देत होत्या. दोन तीन गाण्यांचे मुखडे पण म्हटले प्रश्नोत्तराच्या दरम्यान. त्यात त्यांचं आवडतं एक मराठी गाणं पण होतं. केतकीच्या बनी तिथे, नाचला गं मोर... बोलताना न चढणारा स्वर गाताना मात्र सहज टिपेला भिडला. या वयातही. आजकल तेरे मेरे प्यार के चर्चे हर जुबान पर... हे उडत्या लयीतल गाणंही लीलया म्हटलं. लताजींच्या संदर्भात स्वाभाविकच प्रश्न होते. एक होता - तुमचे संबंध कसे होते? त्यावर त्यांचं उत्तर होतं - आम्ही भेटत होतो. आमच्यात व्यवस्थित रॅपो होता. दुसरा प्रश्न होता - दोघींचे आवाज खूप मिळतेजुळते आहेत. तुम्हाला काय वाटतं? उत्तर होतं - आम्ही दोघी कदाचित एकाच वेळी देवाकडे आवाज मागायला गेलो असू. अन् त्याने आम्हाला तो विभागून दिला असेल.
- श्रीपाद कोठे
२८ मार्च २०२३
(पद्मभूषण मिळाल्यानंतरची)
