भूक

आजकाल अलक असा एक प्रकार असतो. हे अलकमध्ये बसेल का?

###########

देवळात विठोबा करून बाहेर पडलेला महेश, पोटोबा करायला शेजारच्या उपहारगृहात जात होता. उपहारगृहातून एक जण पोटोबा करून बाहेर येत होता. त्याच वेळी केस पिंजारलेल्या एका १०-१२ वर्षांच्या मुलीने त्या व्यक्तीपुढे हात पसरला. त्याने पैसे वा खाद्यपदार्थ न देता तिला सल्ला दिला - भिक नको मागत जाऊ. महेशने खिशात हात घातला आणि तिच्या हातावर एक नोट ठेवली. ती निघून गेली. बाहेर पडणारी व्यक्ती महेशला म्हणाली - 'तुम्ही लोक असे करता. हे बरोबर नाही. त्यांनी सन्मानाने जगले पाहिजे.' महेश त्या गृहस्थाला म्हणाला - 'तुमच्याशी सहमत. त्यांनी सन्मानाने जगलेच पाहिजे. पण मला त्या सन्मानाच्या आधी रांगेत उभी असलेली तिची भूक दिसली आणि महत्त्वाची पण वाटली.' तो बाहेर पडला. महेश आत गेला.

- श्रीपाद कोठे

बुधवार, २७ सप्टेंबर २०२३