न्यूज-२४ वाहिनीवर आजच्या स्वातंत्र्य दिनानिमित्त एक उर्दू मुशायरा आयोजित करण्यात आला होता. विशेष म्हणजे भारत आणि पाकिस्तान असा हा मुशायरा होता. म्हणजे न्यूज-२४ च्या दिल्लीतील स्टुडीओत काही शायर (महिला, पुरुष) आले होते आणि लाहोरच्या स्टुडीओत पाकिस्तानचे शायर (महिला, पुरुष) आले होते. न्यूज-२४ च्या स्टुडीओतील संचालन एक पुरुष करीत होता आणि लाहोर स्टुडीओतील संचालन एक महिला करीत होती. एक कलाम दिल्लीतून आणि एक कलाम लाहोरहून सादर केला जात होता. भारत आणि पाकिस्तानातील दोन टीव्ही वाहिन्यांनी असा कार्यक्रम आयोजित करण्यात पुढाकार घेणे सुखद म्हटले पाहिजे. लाहोर स्टुडीओतील महिला बुरख्यात नव्हत्या. एकीकडे सीमेवर घुसखोरी, दहशतवादी कारवाया, शरीफ यांची सतत उलथून टाकण्यासाठी पाकिस्तानात त्याच्या स्वातंत्र्य दिनी निघालेले दोन मार्च, हे चित्र; तर दुसरीकडे संयुक्त मुशायरा.
गंमत म्हणजे, लाहोर स्टुडीओतील प्रत्येकाने भारताचा उल्लेख `हिंदुस्तान' असाच केला. प्रत्येक वेळी. `हिंदुस्तान' की आवाम, `हिंदुस्तान' की कलाम, `हिंदुस्तान' की शायरी, `हिंदुस्तान' के फनकार वगैरे. पाकिस्तान टीव्हीच्या बातम्यांची आठवण यावी असे. त्यातही असतेच ना- `हिंदुस्तान' के वजीरे आझम, `हिंदुस्तानी मुल्क' वगैरे. मनात आले, आपल्याला `हिंदुस्तान' चालत नाही, पण जगाच्या मनात, जाणीवेत; एवढेच नाही तर आपल्या कट्टर शत्रूच्या मनात आणि जाणीवेतही आपण `हिंदुस्तान'च आहोत. त्यांच्या मनात मुळीच संभ्रम नाही.
एक गोष्ट मात्र नोंद घ्यावी अशीच- दिल्ली स्टुडीओतील संचालनकर्त्याने लाहोरमधील शायरांना धन्यवाद देतानाच स्वातंत्र्यदिनाची `मुबारक बात' दिली; मात्र लाहोर स्टुडीओतील संचालन करणाऱ्या महिलेने दिल्लीतील शायरांना फक्त धन्यवाद दिले, स्वातंत्र्याची `मुबारक बात' नाही दिली.
- श्रीपाद कोठे
१५ ऑगस्ट २०१४
कोणत्याही टिप्पण्‍या नाहीत:
टिप्पणी पोस्ट करा