एका चित्रपटगृहात सगळे लोक रा. स्व. संघाची प्रार्थना, तेही संघाच्या प्रणामाच्या स्थितीत म्हणतानाचा व्हिडीओ पाहण्यात आला. माझ्या मते हे अयोग्य आहे. हे अगदी स्पष्ट आहे की, सध्या गाजत असलेल्या 'काश्मीर फाईल्स' याच चित्रपटाच्या संदर्भात हे घडले असेल. उपस्थित सगळे लोक प्रार्थना म्हणतात याचा अर्थ ते सगळे संघाचे स्वयंसेवक वा हितचिंतक असणार. याचा वेगळा अर्थ काढून जर कोणी म्हटले की, हा चित्रपट संघाचा प्रपोगंडा आहे, तर ते चूक कसे म्हणता येईल? दुसरे म्हणजे या चित्रपटातील विषय हे संघाचे पेटंट होऊ शकत नाही. तो आज नसला तरीही संपूर्ण समाजाचा विषय व्हायला हवा. तो तसा होण्यासाठी तो modest पणेच समाजात प्रसृत व्हायला हवा. दादागिरीच्या स्वरूपात नाही. आक्रस्ताळेपणाच्या किंवा अभिनिवेशाच्या स्वरूपात नाही. संघाची प्रार्थना समाजात दोन तट निर्माण करण्यासाठी नाही. अन सगळेच्या सगळे एखादी गोष्ट मान्य करतील, स्वीकारतील; तेही आज आणि आत्ता; असे कधीच होणार नाही. अशा प्रकारे प्रार्थना करणे म्हणजे प्रार्थनेचा आयुध म्हणून वापर करणे होईल. जे अयोग्य आहे. संघाने अनेक गोष्टींचा जो संयम इतकी वर्षे ठेवला, ज्या संतुलित आणि सभ्य पद्धतीने सगळ्या गोष्टी हाताळल्या त्यात संघाच्या आणि संघ विचारांच्या यशाचे आणि स्वीकार्यतेचे गमक आहे. अनुकूलतेच्या जल्लोषात तपश्चर्या बिघडून जायला नका एवढेच.
- श्रीपाद कोठे
१४ मार्च २०२२
कोणत्याही टिप्पण्‍या नाहीत:
टिप्पणी पोस्ट करा