काल संभाजी भिडे यांना अपघात झाल्याची माहिती फेसबुकवर पाहिली. एका वृत्तपत्राच्या साईटवर पण ती होती. त्या पोस्टवर शेकड्याने कमेंट होत्या. त्यात खूप कमेंट्स वाह्यात प्रकारच्या होत्या. यात नवीन काही नाही. काहीच नाही. सगळ्यांना आता ते सवयीचे झाल्यासारखे आहे. आपल्याला न आवडणाऱ्या, न पटणाऱ्या व्यक्तींबद्दल, समूहांबद्दल, संघटना वा संस्थांबद्दल, विचारांबद्दल, पक्षांबद्दल खालच्या स्तराची भाषा वापरून बोलणे, लिहिणे खूप वाढले आहे. हे योग्य नाही, चांगले नाही असे सगळ्यांनाच वाटते. तरीही हे वाढत्या प्रमाणात सुरू आहे. क्रिया, प्रतिक्रिया सुरू असतात. परंतु हे थांबायला हवे असे ज्यांना, ज्यांना मनापासून वाटते; विश्वास, सौहार्द वाढावे असे ज्यांना ज्यांना वाटते त्यांच्यासाठी एक विनंतीवजा आवाहन - 'मी हिणकस भाषा वा भावना यापासून दूर राहीन. मी अशा भाषेचा अजिबात वापर करणार नाही. अशा भाषेला अन भावनांना प्रत्यक्ष किंवा अप्रत्यक्ष दुजोरा देणार नाही. त्यांना लाईक्स देणार नाही. सोबतच मी ज्यांना सांगू शकेन, म्हणू शकेन त्यांना हेच आवाहन करेन. याबाबत माझे-तुझे विचार मी करणार नाही.'
- श्रीपाद कोठे
२८ एप्रिल २०२२
कोणत्याही टिप्पण्‍या नाहीत:
टिप्पणी पोस्ट करा