मोदींच्या योगाची हिटलरशी तुलना करणारे पोस्ट पाहायला मिळत आहेत. काही पोस्ट तर असभ्य म्हणाव्या अशा आहेत. द्वेष लोकांना किती आंधळं करू शकतो याचा हा उत्तम नमुना म्हणावा लागेल. यात अगदी पानटपरीवरील विद्वानांपासून समाजात प्रतिष्ठाप्राप्त खऱ्या अभ्यासक, लेखक, चिंतक, विद्वान यांचाही समावेश आहे. हिटलरची आयोजने आणि योगाचे आयोजन, यात संख्या, शिस्त, सामूहिकता या बाबी समान असल्या तरी त्यामागील भावनाच नव्हे तर, त्या आयोजनाचा प्रकार सुद्धा वेगळा आहे. मोदींनी योगाच्या आयोजनासाठी पद्धतशीरपणे सगळ्या जगाला सहभागी करून घेतले. शत्रू समजले जाणारे सुद्धा यात सहभागी झाले. युनोसारख्या मान्यता असलेल्या जागतिक संस्थेच्या माध्यमातून हे घडवून आणले. भारतात जरी या आयोजनाचे श्रेय स्वाभाविक पूर्णत: मोदी यांना जात असले, तरी जगभरात हा युनोचा कार्यक्रम म्हणून साजरा झाला. शिवाय जागतिक योग दिन नसता जाहीर करण्यात आला, तरीही योगाला जगात पूर्वीपासून मोठी मान्यता आहे. कोट्यवधी देशी विदेशी लोकांच्या जीवनाचा तो भाग आहे. युनोने जागतिक योग दिवस जाहीर करणे आणि त्याचे जगभरात सामुहिक कार्यक्रम यामुळे फक्त त्याला आणखीन बळ मिळाले आणि मानवी जीवनाच्या संदर्भात ज्या चित्रविचित्र प्रतिमांचा मारा आज मानवावर होत आहे त्यात एका चांगल्या प्रतिमेची भर पडली. अयोग्य, असभ्य, अनावश्यक प्रतिमांच्या गोंधळात एक सकारात्मक, सभ्य, योग्य, आवश्यक प्रतिमा स्थापन झाली. कोणत्याही रीतीने योगाचे सार्वजनिक आयोजन आणि हिटलर यांची तुलना होऊच शकत नाही. अशी तुलना करणाऱ्यांनाही हे ठावूक आहे. पण...
हा पणच महत्वाचा आहे. गाढवे बिथरली आहेत, हे मात्र नक्की. अनेक सज्जन म्हणतात त्याकडे दुर्लक्ष करावे. मात्र त्यांच्याबद्दल आदर ठेवूनही सांगावेसे वाटते की नाही, दुर्लक्ष नको. बिथरलेली गाढवे काय करतील सांगता येत नाही. अशाच वेळी जास्त सावधानता हवी आणि त्यांना नरम करण्यासाठी, त्यांचे उधळणे आटोक्यात आणण्यासाठी आवश्यक उपायही हवेत.
- श्रीपाद कोठे
२४ जून २०१५
कोणत्याही टिप्पण्‍या नाहीत:
टिप्पणी पोस्ट करा