दोन दिवसांपूर्वी लहान भावाच्या लग्नाचा वाढदिवस होता. त्याला एक मुलगा. त्या दिवशी मग आईने आणि मुलाने त्यांना ओवाळले. मुलगा, मुलगी, मुली हे करतात मुलांनी का करू नये, बदल, परिवर्तन इत्यादी इत्यादी खूप चालत असतं. हे त्यातील काहीही नाही. आज आपण ज्या भाषेत बोलतो, जी शब्दावली वापरतो तीच खरं तर तोकडी अन भ्रमित करणारी आहे. ११ वीत शिकणाऱ्या पुतण्याने आईवडिलांना ओवाळणे हा स्वाभाविक विकासाचा आविष्कार आहे. अमुक केलं म्हणजे अमुक, अमुक केलं नाही म्हणजे तमुक, अमकी गोष्ट सिद्ध करायला अमुक करायचं वगैरे वगैरेच्या पलीकडचा हा आविष्कार. झाडाला कोंब फुटतात तसा सहज उगवलेला. चांगलं, वाईट, श्रेष्ठ, कनिष्ठ, न्याय, अन्याय या परिभाषात न अडकणारा. थोडं वेगळं आहे म्हणून सगळ्यांना सांगण्याचा मोह झाला.
- श्रीपाद कोठे
२९ नोव्हेंबर २०१६
कोणत्याही टिप्पण्या नाहीत:
टिप्पणी पोस्ट करा